"Bumbero ng Masa"

     ni Greg Lopez

Kung may naganap na sunog, kalamidad o sakuna, sadyang napakadali lang iparamdam ang iyong pagdadalamhati at pakikiramay  sa mga biktima thru social media. Papindot-pindot lang sa cp ay masabi  mo agad ang iyong simpatya. Easy lang sabihin pero ang  mag-volunteer o kusang loob na magbigay  ng oras at lakas para makatulong sa kapwa para sa kanilang kapakanan at kaligtasan - doon madarama ang tunay na pagmamahal at malasakit.

Yan ang pinamalas ni Konsehal Mon Morales na  mahigit na sa dalawang dekada ang pamumuno bilang Fire Chief ng Arranque Volunteer Fire Brigade ,Inc. o AVFBI.  Sa kanya nababagay ang kasabihang "Action speaks louder than words." o "strike while the iron is hot" sa kanyang mabilis na pagkilos at sa literal na pagtulong sa ngalan ng kawangawa o bolunterismo. Serbisyo na walang inaasam na kapalit. Taos puso.

 Ang pagtulong sa kapwa ay nananalatay sa kanyang ugat. Ang kanyang ama na si Elpidio Morales ang isa sa mga haligi  ng AVFBI mula pa noong  dekada sisenta. Ito ay natatag  makalipas lamang ang walong buwan kung saan naganap ang isang napakalaking sunog sa Manila Chinatown.

Febrero 21, 1964 ng matupok ang halos walong bloke ng  kabahayan at establisimento. Napakalaki ng pinsala ng mala-impyernong trahedya na gumimbal sa Maynila. Daang milyong halaga ng ari-arian ang naabo at libo-libong biktima  ang  nawalan ng tirahan. Sa kasaysayan,tinala ito bilang pinakamalaking sunog na naganap mula ng sumiklab ang World War II.

Walong buwan matapos ang  kalunos-lunos na trahedya naitatag dito sa Arrangue ang kaunaunahang samahan ng bolunterismo,  ang Arranque Center Barangay  ng Barangay 179 Zone 29. At makaraan ang ilang araw pa , sa tulong ng mga Filipino at Chinese businessman na pinangungunahan ni Leon Guevarra nabuo ang AVFBI at si Elpidio Morales o Mang Pidyong ang kaunaunahang namuno sa mga Fire Volunteers. Ang kanilang layunin ay upang di na maulit muli ang malungkot na karanasan sa kakulangan ng paghahanda at equipment sa pag-apula ng apoy at pagresponde  sa mga kalamidad.

Mula noon ay nagsunuran ng magtatag  ang iba pang lugar ng  mga fire volunteers tulad ng North Binondo ni Brgy. Ghairman Johnny Que , Binondo Fire ni Jerry Chua ,  Chinatown Fire Brigade, New Market  at South San Nicolas Fire Fighter at iba pang mga Fire Brigade Associations na ang iba ay pinamumunuan ni Rolly So.

Lumaganap na ang kawang-gawa o bolunterismo sa buong Pilipinas.

Trailblazer sa bolunterismo ang kanyang ama. Di maikakaila na ang anak na si Kon. Ramon Morales ay sumunod sa yapak ng walang pagod na pagtulong sa kapwa. Sa mahigit dalampung taon hanggang sa kasalukuyan na paninilbihan bilang Fire Chief,  napakarami ng sunog ang kanilang na respondehan at naapula.  Sobrang dami na ng buhay na nai-ligtas at mga pamilya na  natulungan.

Sari-saring pagkilala,  papuri at parangal  ang kanyang natanggap mula sa iba't ibang organisasyon , mga LGU at NGO at sa mga naging pinuno ng Lungsod ng Maynila.  Nagsimula siya bilang kagawad ng siya ay sumabak sa pulitika at ng  siya ay nahalal  bilang Barangay Chairman ay namuno ng matagal na panahon. Naging presidente rin sya ng Liga ng Barangay Nagsilbi ng isang terminong appointed at dalawang  termino bilang elected na konsehal sa Ikatlong Distrito ng Maynila mula 2006 hanggang 2016.

"Tunay na nagtratrabaho at gumagawa. Bunot sa barangayan, itinadhana ,tinaga sa panahon at pinanday sa hirap, yan si Mon Morales" Ito ang naging pagpapakilala sa kanya ng isang mataas na opisyal sa isang pagtitipon. Siya ang patunay na mas matunog ang gawa kaysa salita  dahil walang kibo niyang ginagawa ang kanyang adhikain na tumulong sa kapwa.

Nagsimula siya sa isang trak ng bumbero at sa tulong ng maraming kaibigan ay nadagdagan na ito ng nadagdagan. Meron na rin siyang mga ambulansya na rumiresponde sa sunog at madalas sumasaklolo rin sa dumaraming trapik aksidents na madalas nainbolb  ang mga motorsiklo.

Boluntaryong buwis buhay na pag-saklolo sa mga nasusunugan. Sa haba ng panahon ng pag arangkada ng mga trak ng bumbero at  sa pakikipag-patintero sa nagngangalit na  apoy ,  limang tao na ang nalagas sa kanyang hanay. Hindi matatawaran ang pagmamahal at sakripisyo na inalay nila sa kanilang kapwa at ang kanilang dedikasyon sa kanilang boluntaryong pagtulong sa mga biktima ng sunog at ibang trahedya.   

 Pinag-iibayo ni Mon  ang trayning ng kanyang mga volunteers upang sila'y mas maging physically fit at handa sa susuungin nilang pagsagip sa buhay at mga ari-arian. Ang pagsasanay sa pag-gamit ng mga modernong firefighting equipment at kaalaman sa mga  protokol sa pagresponde at pag-apula ng apoy  ay regular na tinuturo niya  sa mga volunteers sa Fire Station niya  sa Soler.

"Hindi sapat magpakita ng  simpatya sa konting patungo-tungo lang ng ulo at sa konting salita  - kailangan kumilos at tumulong at gumawa," ang sabi ni Mon habang paakyat na siya upang manehuhin ang Tanker sa pag responde niya at ang kanyang mga volunteers  sa isang sunog na nag-alarma sa Malate.

Nag-ugat noong dekada sisenta  at nagpatuloy sa bagong milenyo, sa panahon ng teknolohiya  napakalaki na ng mga pagbabago ngunit ang dugong nananalantay kay Mon Morales talagang tinaga sa panahon. Mas kilala sya ngayon sa bansag na  "Bumbero ng Masa " dahil na rin sa dami ng sunog na nirerespondihan niya sa buong Kamaynilaan.  Isang pagkilala sa taong darang sa init at  walang humpay sa pag-aapula sa lumilingas  na banta  ng apoy sa ating kapaligiran.